BAGUIO CITY – Dukduktalen paylaeng dagiti otoridad ti rason iti forest fire a napasamak iti kabambantayan sadiay Topdac, Atok, Benguet itay laeng nabiit.
Sigun kenni Topdac, Atok Punong Barangay Elmer Gabol, napasamak ti uram iti kabambantayan ti sub-sitio dagitoy sadiay Bayading, Makidot Area.
Kinunana a nagrugi ti nasao nga uram ti malem iti Sabado ken nagsardeng daytoy idi nagramaram pababa iti karayan.
Dinakamatna a nagresponde dagiti bombero ti Atok ngem saan dagitoy a nakadanun iti mismo nga ayan ti uram gaputa awan ti kalsada nga agturong sadiay.
Sigun met kenni SFO1 Paul Gumangan ti Bureau of Fire Protection – Atok, dumanon iti tallo nga ektarya a kabambantayan ti nauram iti nasao nga insidente, partikular iti nagbeddengan ti Atok ken Bokod.
Naamuan iti inisyal nga imbestigasyonda a nagtaud ti uram iti paset ti Bokod isut gapuna a bassit laeng ti nauram iti paset ti Topdac, Atok.
Innayonna a nasurok maysa a kilometro ti kaadayo ti uram iti Halsema Highway.
Sigun pay kenni SFO1 Gumangan, addda dagiti sumagmamano a babbalay a naapektaran ngem awan ti nailista a nauram wenno nadangran nga indibidual.
