Nakabalud itan dagiti tallo a suspek gapu iti mapapati a panagkolektarda ti kuarta manipud kadagiti illegal gambling operators bayat ti operasion dagiti otoridad sadiay General Santos City idi kalman.
Sigun kenni Criminal Investigation and Detection Group chief Police Major General Leo Francisco, ar-aramaten dagiti suspek ti nagan dagiti opisiales ti Philippine National Police (PNP) pakairamanan ti hepe a ni Police General Rommel Marbil ken ti nagan ti direktor ti Criminal Investigation and Detection Group tapno mangkikil ti kuarta.
Kinuna ni Francisco a dagiti suspek ket manipod Batangas ken Pasig City.
Mapapati a dagiti suspek ket agkidkiddaw ti P2.5 million manipod iti iligal a gambling operators iti nasao a lugar.
Gapu iti daytoy, nagballaag ti opisial iti publiko a saanda a patgan dagiti kiddaw ti sumagmamano nga indibidual a makipaset iti iligal nga aktibidad.
Maipila ti kaso a panaglabsing ti Comprehensive Firearms and Ammunition Regulation Act kadagiti suspek.
