BAGUIO CITY – Maar-aramaten ita iti Baguio City Community Isolation Unit ti tallo a telepresence robots a Logistic Indoor Service Assistant (LISA) a tumultulong kadagiti medical frontliners sadiay.
Sigun kenni Nurse II Imelda Payas iti Operation Center ti pasilidad, tumultulong ti robot iti komunikasyon ti pasyente ken ti nars wenno doktor babaen iti smart phone a nakakabit iti daytoy a nakakonektar iti internet.
Kinunana nga addaan pay ti robot iti compartment box a pangikabkabilanda kadagiti agas ken daytoy ti itulod ti robot iti silid ti nakariing ken stable a COVID patient.
Dinakamatna a mabalin a sumrek dagiti robot iti contaminated area ti isolation unit bayat nga agtalinaed dagiti nars iti green area tapnu maliklikan ti cross infection.
Inawaganda iti Margaret, Theresa ken Catherine dagiti tallo a robot a naadaw iti nagan dagiti wards iti isolation unit.
Nupay kasta, inaklonna a self-learning ken saan pay a naikabesa dagiti medical frontliners iti pasilidad ti panaka-aramat dagiti nasao a robots gaputa naipaima laeng dagitoy kadakuada nga awanan ti demonstrasyon.
Naamuan a dagiti robots ket indonar ti maysa a bacth dagiti graduates ti maysa a boys high ditoy Baguio City.
