BAGUIO CITY – Nakemmeg ti tallo a turista manipud Metro Manila kalpasan a nakumpiskar kadakuada ti adu a marijuana iti naisayangkat nga interdiction operation iti maysa a bus terminal ditoy siudad ti Baguio idi rabii.
Nabigbig dagitoy a da Joseph Brizuela, 22-anyos, residente ti Antipolo City; Samuel Flor Christian Baldovino, 21-anyos, residente ti Antipolo City ken ni Rhey John Hernandez, 24-anyos, residente ti Pasig City.
Nakumpiskar manipud iti bag dagitoy ti 17 a marijuana bricks ken 2 a tubular shape a marijuana nga aggatad amin iti P2-M.
Sigun kadagiti otoridad, nagtaud ti bus a nagluganan dagiti tallo sadiay Bontoc, Mt. Province ken naisayangkat ti operasyon idi bimmabada iti bus terminal sadiay Slaughter Compound.
Naisayangkat ti operasyon babaen iti nagtipon a pwersa ti nagduduma nga unit ti PDEA-Cordillera, Baguio City PNP, Benguet PNP ken Mt. Province PNP.
Sumangsango ita dagiti tallo iti kaso a panaglabsing iti RA 9165 wenno ti Comprehensive Dangerous Drugs Act of 2002.
