BAGUIO CITY – Mapasangbay ita nga aldaw, October 23 ditoy Baguio City ti dumanon 300 a turista manipud iti nagduduma a probinsia iti Luzon kalpasan a nailukat ti turismo ti siudad kadagiti turista manipud Ilocos Region idi October 1.
Sigun kenni Baguio Mayor Benjamin Magalong, paset daytoy ti plano a panakailukat ti siudad kadagiti turista manipud iti entero a Luzon, pakairamanan ti Metro Manila iti baet ti report ti UP OCTA Research Team a maysa ti Baguio kadagiti ‘high-risk areas’ iti COVID-19 gapu iti agtultuloy ken innaldaw a panagngato ti kaso ti nasao a sakit ken iti critical care occupancy.
Nupay inaklonna nga adda ti panagngato iti kaso ti COVID-19 iti panakailukat ti ekonomiya a kas iti panaglukat ti tourism sector, ipaspasiguradona met nga agtultuloy ti nainget a contact tracing, napalawa a COVID testing ken panangpapintas ti city government iti critical healthcare capacity ti Baguio.
Impettengna a nasuron ti lokal a gobyerno a mangimaton ken mangkontrol kadagiti kaso isut gapuna a saanda a nag-panic weno nadanagan iti nakitana ti panagngato ti kaso ti COVID-19 ditoy siudad.
Impannakkel pay ti Contact Tracing Czar nga iti entero a pagilian ket ti Baguio City ti addaan kangatuan a testing capacity nga agresresulta iti panagngato ti kaso ti COVID-19.
Kabayatanna, iti datus ti Baguio Visitor Information and Travel Assistance (VISITA) platform, nasuroken iti 2,800 dagiti indibidual ti nagrehistro tapnu mapalubusanda nga agpasyar ditoy City of Pines.
Kaaduan a travel requests ket nagtaud sadiay National Capital Region (269) a sinaruno ti Region 3 (109) ken Region 4A (64), malaksid iti tallo a travel requests manipud iti ballasiw taaw, partikular sadiay Estados Unidos.
Naamuan met a manipud nailukat ti tourism bubble ti Baguio City ken Region 1 idi October 1 ket 15 paylaeng a turista ti nakastrek iti siudad manipud kadagiti 59 a turista manipud Region 1 a nagaplikar ti travel requests.
Agtalinaed met ti limitasyon a 200 a bisita ti mapastrek iti siudad iti innaldaw ken nasken nga iparang dagitoy kadagiti border checkpoints ti QR Code wenno ti pammaneknek a mabalinda a makastrek ditoy siudad.
