BAGUIO CITY – Agtultuloy ti nainget a panagsukimat dagiti otoridad a mangimanmando kadagiti border controls pastrek iti Baguio iti dokumento dagiti travellers a sumsumrek iti siudad.
Paset daytoy ti panag-annad ti siudad manipud iti pangta dagiti napegpeggad ken mas nalaklaka a maiyakar a variants ti COVID-19.
Maibasar iti datus, manipud Agosto 1 agingga Agosto 22 ket dumanonen iti 377 nga indibidual ti napasubli wenno saan a napalubusan a makalsut kadagiti border checkpoints gapu iti panakapaay dagitoy a mangipakita iti kompleto ken kaskenan a dokumento.
Impannakkel met ni Mayor Benjamin Magalong a nagresulta ti nainget nga implementasyon ti border protocols iti panakatiliw ti 14 nga indibidual manipud ruar ti rehion gapu iti panagaramat dagitoy kadagiti peke a travel documents.
Innayonna a tallo metten a colorum a lugan ti natiliw kabayatan ti nasao a panawen bayat a naipilaan metten iti kaskenan a kaso, partikular ti falsification of document ken panaglabsing iti Republic Act 11332 wenno Mandatory Reporting of Notifiable Diseases and Health Events of Public Health Concern Act dagiti natiliw nga indibidual.
Kiniddawna pay ti panagtalinaed a naridam ken nasirib dagiti pulis a mangimanmando kadagiti border checkpoints ken triages, nangruna iti panangsukimatda kadagiti dokumento dagiti sumsumrek iti siudad ti Baguio.
