BAGUIO CITY – Dumanon iti 3,780 nga operators dagiti parapasahero a jeep ken filcabs iti rehion Cordillera ti naituding nga agnumar iti one-time fuel subsidy iti sidong ti Phase 3 ti Pantawid Pasada Fuel Program ti nasyonal a gobyerno babaen iti Land Transportation Franchising and Regulatory Board (LTFRB).
Sigun kenni LTFRB – Cordillera Regional Director Engr. Lalaine Sobremonte, nakasaganan ti pondo para iti nasao a tulong pinansial kadagiti nasao nga operators ditoy rehion.
Naamuan a makaawat dagiti benipisaryo iti P7,200 tunggal yunit ti lugan dagitoy.
Nakwalipikar iti nasao a tulong pinansial dagiti operators dagiti jeep ken filcabs nga addaan ti operasyon ken valid franchise grantees ti Special Permits nga impaay ti LTFRB-Cordillera.
Naamuan a 2,947 kadagiti benipisaryo ti addaan ti bukod ken aktibo a Pantawid Pasada card bayat nga 833 kadagitoy ti maipaayan paylaeng ti nasao a card.
Naiyunay-unay met kadagiti benipisaryo a maiparit ti panang-withdraw dagitoy iti kwarta gaputa maaramat laeng daytoy no agpa-gasolina wenno agpa-krudo-da kadagiti paggasolinaan a naipaayan ti akreditasyon para iti Pantawid Pasada Fuel Program.
