BAGUIO CITY – Nakemmeg manen ti 39-anyos a recidivist gapu ta sumangsango iti nagduduma a kaso.
Daytoy ket babaen iti nainget nga operasyon ti Baguio City Police Office nu sadino natiliw daytoy idiay Tacay, Pinsao Proper, Baguio City.
Nabigbig ti suspek iti nagan a “Mulong”, maysa a High Value Individual ken maysa kadagiti nailista a top 10 Top Most Wanted Person iti Police Regional Office -Cordillera Illegal Drug Personality ken ranked Top Most Wanted Person ti siudad.
Maibasar iti imbestigasyon, ni Mulong ket leader ti Maraya Robbery Criminal Group manipud 2008 agingga 2015 nga agop-operate iti Baguio City ken La Trinidad, Benguet.
Ti modus dagitoy ket agtakaw kadagiti pagtaengan tunggal agsapa nu sadino gundawayanda ti kinaawan ti tao iti puntirya da a balay.
Immunan a na-convict daytoy gapu iti panaglabsingna iti Republic Act 10591 wenno Illegal Possession of Firearms in relation to COMELEC Gun Ban ken nangiserbi ti sentensiyana idi tawen 2015.
Ngem kalpasan a nawaya-wayaan idi tawen 2022, nakemmeg manen gapu iti kaso a Robbery with Force Upon Things.
Malaksid iti dayta, sumangsango pay ti suspek iti kaso a panaglabsing iti Article 151 iti Revised Penal Code wenno Resistance and Disobedience to a Person in Authority or the Agents of such Person kalpasan a nagibas iti checkpoint nga impatungpal dagiti otoridad idi Marso ita a tawen.
Iti nasao nga operasyon, imbati na ti bag a naglaon ti maysa a brick ti marijuana ken firearms.
Sumangsango pay daytoy iti kaso a panaglabsing iti Republic Act 9165 wenno Comprehensive Dangerous Drugs Act of 2002 ken ti Republic Act 10591 wenno Comprehensive Firearms and Ammunition Regulation Act.
Awan ti naipaay a piyansa kenkuana para iti temporaryo a pannakawaya-wayana.
Iti agdama, nakabalud ti suspek iti Baguio City Jail Male Dormitory.
*Recidivist – a convicted criminal who reoffends, especially repeatedly.
