BAGUIO CITY – Nailista ti uppat a baro a kaso ti COVID-19 iti rehion Cordillera idi kalman.
Maibasar iti report ti Department of Health Cordillera, nailista ti dua a kaso iti Baguio City, maysa iti Itogon, Benguet ken maysa iti Apayao.
Linawlawagan ti ahensia a nailista ti maysa a kaso iti Baguio City nupay ti pasyente ket adda ita iti ospital sadiay NCR gaputa ti panagreport ket maibasar iti pagnanaedan ti pasyente.
Kabayatanna, impasidong ni Itogon Mayor Victorio Palangdan iti total lockdown dagiti sitio ti Sabkil, Tocmo, Labilab ken Bakong sadiay Barangay Loacan kasaruno ti panagpositibo iti COVID-19 ti maysa nga indibidual manipud Labilab, Loacan, Itogon.
Manarimaan metten ti nainget a contact tracing kadagiti nakapulapol ti nasao a pasyente.
Kabayatanna, nagpabigbig ti maysa kadagiti dua a baro a kaso ti COVID-19 ditoy Baguio City kas sungbatna iti kiddaw ni Mayor Benjamin Magalong a tulong dagitoy para iti nalaklaka a contact tracing.
Nabigbig daytoy a ni Ailene Doria, 28-anyos, residente ti City Camp Central ken maysa a returning Baguio worker a sinmangpet ditoy siudad idi May 29 tapnu ituloy ti trabahona kas store manager iti maysa kadagiti establishimento ditoy Baguio.
Nagtaud daytoy iti company-appointed boarding house sadiay San Fernando, La Union a nagtalinaedanna iti tallo nga aldaw manipud May 26 tapnu urayenna ti kumpirmasyon iti panagsublina ditoy Baguio.
Naamuan a nagtalinaed pay ni Doria iti ilida a Binmaley, Pangasinan iti dua a bulan manipud March 16 kalpasan a nasuspindir ti trabahona gapu iti Enhanced Community Quarantine ditoy siudad.
Kinunana a nagtungpal daytoy iti proseso dagiti indibidual a napalubusan nga agsubli ditoy Baguio kas iti panakaipasidongna iti triage apaman a nakadanun ditoy siudad.
Simmaruno a naipasidong iti diagnostic x-ray ken ditoy a nakita ti maatap a pneumonia kenkuana a nagresulta tapnu maipasidong iti swab test wenno reverse transcription-polymerase chain reaction test.
Kalpasanna ket nagdiretso daytoy iti pagab-abanganna para iti self-quarantine ken sigun kenkuana ket nainget a sinurotna ti balakad nangruna ta agmaymaysa daytoy.
Immapela pay ni Doria iti panaka-awat ti publiko nangruna ta uray daytoy ket saanna nga ammo a naiyakar kenkuana ti nasao a sakit.
