BAGUIO CITY – Birbiruken ita dagiti otoridad dagiti uppat nga indibidual a persons of interest wenno maatap nga agtagikua kadagiti nadiskobre a marijuana plantation sites sadiay Kolong, Wangal, La Trinidad, Benguet a nakadadaelan ti P640-K a gatad dagiti marijuana idi kalman.
Sigun kenni PMajor Cleff Vencio, hepe ti La Trinidad Municipal Police Station, sumango dagiti uppat iti kaso a panaglabsing iti Comprehensive Dangerous Drugs Act of 2002.
Kinunana a naisayangkat ti serye ti marijuana eradication operation kalpasan a naduktalan dagiti pito a disso nga addaan kalawa a 375 square meters a namulaan kadagiti marijuana.
Dinakamatna a nasurok 2,000 a pidaso dagiti fully-grown marijuana plants nga aggatad ti P640-K ti pinarut ken inuram dagiti nagtipon a pwersa dagiti pulis iti La Trinidad, Benguet ken PDEA-Benguet.
Maipalagip nga idi laeng February 18 ket pinarut ken inuram metlaeng dagiti otoridad dagiti marijuana nga aggatad ti P550-K manipud iti uppat a disso sadiay Tuba, Wangal, La Trinidad, Benguet.
