BAGUIO CITY – Inbilin ni Mayor Benjamin Magalong ti pannaka-ipasidong iti lockdown ti uppat a barangay ditoy siudad kalpasan a nagpositibo iti coronavirus disease ti maysa a residente ti Upper Dagsian ita nga aldaw.
Sigun iti mayor, maipasidong iti lockdown ti Upper Dagsian, Lower Dagsian, Hillside ken Scout Barrio ken dagiti laeng napapateg a travel ti mapalubusan.
Inbilin met laeng ti mayor ti pannakaipasidong iti quarantine dagiti opisial ti barangay ti Upper Dagsian.
Nakaptan iti COVID-19 ti maysa a babae nga agtawen iti 46, streetsweeper sadiay Scout Barrio ken residente ti Upper Dagsian.
Daytoyen ti maika-15 a positibo a kaso ti COVID-19 ditoy Baguio City.
Gapu iti daytoy, maipatpatungpal ti agresibo a contact tracing kadagiti nakapulapol ti pasiente a pakairamanan ti sumagmamano a pulis a sigun ken ni Baguio City Police Director Allen Co ket maipaspasidongen iti isolation.
Inbilin met laeng ni Mayor Magalong ti pannakaipatungpal ti disinfection iti pagtaengan ti pasiente kasta metten iti police station ken dadduma pay a lugar a nagturongan ti pasiente.
Maibasar iti report, umuna a nakarikna iti sintomas ti pasiente idi Abril 3 ken nagpa check-up daytoy idi April 7.
Iti agdama ket adda ti 15 a kumpirmado a kaso ti COVID-19 ditoy siudad no sadino, nagimbagen ti siam (9) kadagitoy ken maysa ti pimmusay bayat a ti dadduma ket agpapaimbag pay laeng.
