BAGUIO CITY- Dumanonen iti 47,000 nga aspirants ti nagaplikar para iti PMA Entrance Examination inton Agosto agingga Setyembre ti agdama a tawen.
Iti interview ti Bombo Radyo Baguio, kinuna ni LTC Mark Anthony Ruelos, panakangiwat ti PMA, inisyal paylaeng ti nasao a bilang gaputa ado ti agkamkamakam.
Impettengna a mabalin pay a maka-apply dagiti aspiring cadets babaen iti social media wenno walk-in agingga inton Agosto uno.
Dinakamatna a maipatungpal ti entrance examination sadiay Mindanao inton Agosto 27 agingga 28; Visayas inton Setyembre 10 agingga 11 ken Luzon inton Setyembre 24 agingga 25, aldaw ti Sabado ken Domingo.
Manipud iti pakabuklan a bilang dagiti examiness, inlawlawag ni LTC Ruelos a 1,500 a top examinees laeng ti alaen da kas maibasar iti resulta ti eksaminasyon.
Inayonna a dagitoy dagiti maipasidong iti medical ken physical examination agingga a mapili dagiti 350 a last man/woman standing.
Impaganetget ni LTC Ruelos a dagiti 350 nga aspirants a makapasa iti nasao a proseso ket isuda ti mangbukkel iti PMA Class of 2027.
