![](https://img.bomboradyo.com/baguio/2020/01/mj.jpg)
BAGUIO CITY – Nakumpiskar dagiti otoridad ti dumanon 50 a kilo ti marijuana manipud iti dua a lallaki iti buy-bust operation sadiay Nambaran, Tabuk City, Kalinga idi kalman.
Nagresulta daytoy iti panakakemmeg dagiti nasao a lallaki a nabigbig a da Reymar Balagtas, 28-anyos ken Victor Dumling, 42-anyos nga agpada a residente ti Ileb, Nambaran, Tabuk City, Kalinga.
Nupay kasta, nakalibas ti maysa pay a kadwa dagitoy nga an-anupen ita dagiti otoridad.
Sigun kadagiti otoridad, nabayagen a binanbantayanda dagiti tallo gapu iti panagsuplay dagitoy iti marijuana sadiay Bulacan, Cavite, Manila ken dadduma pay a lugar iti National Capital Region.
Nangisayangkat dagiti otoridad iti operasyon a nagresulta iti panangkumpiskarda iti 25 a tubular forms ti marijuana leaves ken 25 a marijuana bricks nga aggatad amin ti agarup P6-M.
Nakumpiskar pay ti maysa a caliber 45 pistol manipud kadagiti tallo malaksid laeng iti motorsiklo ken cellphone a naaramat iti transaksion.
Narekober met ti naaramat a buy-bust money.
Naamuan pay a napaltogan ti takkiag ni Dumling kalpasan a ginandatna ti aglibas manipud kadagiti otoridad.
Sumangsango ita dagiti nakemmeg iti kaso a panaglabsing iti Comprehensive Dangerous Drugs Act ken Comprehensive Firearms and Ammunition Regulation Act.