Agsubsublin iti normal a kasasaad ti summer capital of the Philippines kalpasan ti panagdalapos ti bagyo a Pepito.
Iti pannakiuman ti Bombo Radyo kenni Engineer Charles Carame, dadaulo ti City Disaster Risk Reduction and Management Office, saan a nakaro ti epekto ti nadakamat a bagyo iti laksid ti napigsa a tudo ken angin nga intunda ti bagyo a napasaran iti rabii.
Nupay kasta, agtaltalinaed paylaeng dagiti lima pulo ket lima a pamilya iti evacuation center bayat a napasaran met ti pannakapukaw ti suplay ti kuryente kadagiti sumagmamano a barangay iti siudad.
Adda metlaeng dagiti sumagmamano a kayo a natumba ngem dagus metlaeng a dinalusan daytoy dagiti otoridad.
Innayonna metlaeng a naikairekord dagitoy iti babassit a panagreggaay ti daga ngem dagus metlaeng a nadalusan daytoy.
Iti baet dayta, agtaltalinaed a nakared alert paylaeng ti siudad gapu iti nasao bagyo bayat a nakareactivate met dagiti emergency operation center ken response cluster.
Kabayatanna, nagpalagip metlaeng daytoy kadagiti umili a liklikan paylaeng ti rumuar kadagiti uneg ti pagtaengan dagitoy tapno maliklikan ti insidente.
