BAGUIO CITY – Maur-uray ti desisyon ti Commission on Higher Education (CHED) – Central Office iti kiddaw dagiti 6 a pagadalan ti kolehiyo ditoy rehion Cordillera a nagaplikar para iti tuition fee increase para iti sumaruno nga school year 2019-2020.
Sigun kenni Menzie Kuengan, panakangiwat ti CHED-Cordillera, idi pay Pebrero a nagrikep ti aplikasyon dagiti interesado nga agaplikar iti tuition fee and miscelleaous fee increase.
Kinunana a lima a pribado a pagadalan ditoy siudad ti Baguio ken maysa a pagadalan sadiay Tabuk City, Kalinga ti nagaplikar iti tuiton fee increase manipod iti 43 a bilang dagiti pagadalan ti kolehiyo ditoy rehion.
Innayona a kaaduan kadagiti nasao a pagadalan ket agkidkiddaw iti 5-10 percent nga increase manipod iti agdama a babayadan dagitoy.
Inlawlawgna a nalpasen ti konsultasyon kadagiti nasao a pagadalan ken naisumitir iti Central Office dagiti kasapulan a dokumento para iti panangaprobarda iti petisyon dagiti nasao a pagadalan.
Dinakamatna pay a dakkel ti namnama a maaprobaran ti aplikasyon dagiti nasao a pagadalan kas kadagiti napalpalabas a tawen.
Innayonna a nainget met ti panag-monitorda kadagiti nagduduma a pagadalan nu adda iti naipatpatungpal nga upgrading iti pasilidad ken sistema a katukad ti kidkiddawenda nga nga tuition fee increase. (report from Bombo Jorton Campana)
