BAGUIO CITY – Natiliw ti innem nga indibidual kalpasan a nagpositibo ti implementasyon ti search warrant iti maysa a maab-abangan a silid iti Palangdao Building sadiay Kayang Street, Baguio City idi parbangon.
Nakumpiskar iti operasyon ti 10 a pakete ti maatap a shabu nga agdagsen ti agarup nasurok 50 a gramo nga aggatad ti mapattapatta a P340,000.
Natiliw ti agab-abang iti nasao a silid a nabigbig a ni Francis Juan Conting, 46-anyos, mannalon, tubo ti Mankayan, Benguet, residente ti Green Valley, Baguio City ken mabigbigbig a high value target ti PDEA-Cordillera.
Natiliw metlaeng dagiti kakadwa ni Conting a nabigbig a da Gina Lidaco, 28-anyos, online seller, tubo ti Sabangan, Mountain Province, residente ti Kayang-Hilltop, Baguio City; Elmo Amiten Jr., 45-anyos, mannalon, tubo ken residente ti Poblacion, Tuba, Benguet; Dominador Ragudo, 49-anyos, mannalon, tubo ti Balaoan, La Union, residente ti Green Valley, Baguio City; Carlos Ticawa, 62-anyos, mannalon, tubo ken residente ti Poblacion, Tuba, Benguet ken ni Suler Gaspar, 50-anyos, mannalon, tubo ti Kapangan, Benguet, residente ti Wangal, La Trinidad, Benguet.
Naamuan a ti nasao a silid nga ab-abangan ni Conting ket maatap nga agserserbi a drug den ken maysa a sugalan.
Nakumpiskar pay iti operasyon ti sumagmamano a pakete a naglaon ti residue ti maatap a shabu, dua a bala ti paltog ken nagduduma a drug paraphernalia.
Manamnama a sumango dagiti natiliw iti kaso a panaglabsing iti RA 9165 wenno ti Comprehensive Dangerous Drugs Act of 2002.
