BAGUIO CITY – Sumangsango iti nagtutuon a kaso ti innem nga indibidual, pakairamanan ti dua a Chinese nationals kalpasan a gindatda ti sumrek ditoy Baguio City idi kalman babaen kadagiti peke a dokumento.
Maibasar iti report ti Baguio City Police Office – Station 9, resulta daytoy ti nairtengan a panangsukimatda kadagiti motorista a sumsumrek iti siudad babaen iti border COVID-19 checkpoint sadiay Irisan.
Umuna a natiliw ti dua a Chinese nationals ken ti dua a Pilipino a drivers ti nagluganan dagitoy a convoy ti dua a pick-up trucks.
Pinara dagiti pulis ti dua a lugan tapnu sukimaten dagiti dokumento dagiti uppat ngem awan ti naipakitada a travel authority ken ti laeng imparangda ket RT-PCR result ken immunology and serology result ti maysa kadagitoy a nai-issue idi pay October 19.
Dagus a kinumpirmar dagiti pulis dagiti dokumento iti Green City Medical Center ken Cagayan Valley Medical Center a nangi-issue kadagiti dokumento ngem nadiskobre a maysa laeng kadagiti uppat ti impaayan ti Green City Medical Center ti dokumento idi pay September 23 bayat nga awan ti uray asino kadagiti uppat ti inikkan ti Cagayan Valley Medical Center iti aniaman a dokumento.
Simmaruno a nakemmeg iti kapada a checkpoint ti dua nga indibidual a nagtaud sadiay Mabalacat City, Pampanga a nakalugan iti mays a kotse kalpasan a nangiparangda iti peke a travel documents.
Iti panagkumpirmar ti pulisya, kinuna ti Jose B. Lingad Memorial General Hospital sadiay Pampanga nga awan ti nagan dagiti dua iti rekord dagitoy.
Inaklon met dagiti dua a dagitoy a mismo ti nang-edit kadagiti dokumento nga impakitada iti checkpoint.
Iti agdama, addan iti kustodiya ti pulisya dagiti walo nga indibiduyal ken dagiti tallo a lugan para iti umno a disposisyon dagiti kaso dagitoy.
Maipalagip nga idi napalabas a Sabado ket tiniliw metlaeng dagiti pulis ti dua a live-in partners kalpasan a nangipakita dagitoy iti peke a dokumento iti gandatda a sumrek ditoy Baguio City.
