Manarimaan ti panagbirok dagiti otoridad kadagiti innem a pulo ket tallo nga indibidual a naglugan iti dua a bus idiay Nepal kalpasan ti napasamak a panagregaay ti daga nu sadino naiduron ti nagluganan dagitoy a bus iti karayan.
Sigun iti maysa a district official, saan pay laeng a nakitkita dagiti dua a bus nangruna ket nalidem ti karayan kasta met nga agbalbalin a karit nu kasano a maipatungpal ti panagrescue.
Innayon pay ti opisyal a nabaelan met ti tallo a makalasat gapu ta limmagtoda iti bus sakbay a nagaburan daytoy.
Kabayatanna, agarup sangapulo ket maysa nga indibidual ti pimmusay idiay Kaski district, ti makinlaud ti Kathmandu gapu iti napasamak a panagregaay a nangdalapos kadagiti babalay.
Malaksid iti dayta, tallo nga indibidual ti pimmusay met laeng idiay Myagdi district gapu iti panagregaay met laeng.
Impeksa met ni Prime Minister Pushpa Kamal Dahal ti panagladingit daytoy kadagiti mapaspasamak a didigra bayat nga imbilinna ti epektibo a panangipatungpal dagiti government agencies iti search ken rescue operations.
