Inwaragawag ti Philippine National Police – Highway Patrol Group (PNP-HPG) nga adda narekoberda a 76 a natakaw a lugan ken naarestarda ti 45 a suspek idi napan a bulan ti Enero ita a tawen.
Sigun kenni HPG Officer-In-Charge Brigadier General Eleazar Matta, 59 a motor vehicle ken 17 a motorsiklo ti narekoberda manipud kadagiti operasyon nga impatungpalda kontra kadagiti agtatakaw iti lugan.
Malaksid iti daytoy, 420 a motor vehicle ken 2,534 a motorsiklo ti naimpound gapu iti nainget a panangipatungpalda iti linteg trapiko.
Nakaipaayda pay 9,857 a temporary operator’s permits, 5895 nga ordinance violation receipts at 24,883 a traffic citation tickets kadagiti naglabsing iti linteg trapiko.
Sigun pay kenni Matta, nakumpiskarda ti maysa a siren, 134 a horns, 260 a blinkers, 3,205 illegal lights ken 79 modified mufflers iti agtultuloy a kampanyada kontra iti iligal a panagbaliw wenno panagsukat iti lugan.
Dumanon metlaeng iti 1,025 a lugan ti nakumpiskar gapu iti pananglabsingda iti “No Plate, No Travel” policy.
