BAGUIO CITY – Nakaruaren manipud iti Benguet General Hospital (BeGH) ti innem a naimbagan a pasyente ti COVID-19 kalpasan a nagnegatibo ti simmaruno a COVID test dagitoy.
Naisayangkat ti ceremonial send-off kadagiti nasao a pasyente iti main entrance ti ospital no sadino, dua kadagitoy ket residente ti La Trinidad, dua iti Buguias ken saggaysa iti Sablan ken Itogon.
Karaman kadagiti nakaruar iti BeGH ket ni Patient No. 7 a maysa kadagiti kabayagan a nagtalinaed iti ospital kalpasan a na-admit sadiay iti 26 nga aldaw.
Iti agdama, innem laengen ti in-patients ti COVID-19 sadiay BeGH kalpasan a na-admit ita nga aldaw ti maysa a 51-anyos a babai gapu iti COVID-19.
Naamuan a ti nasao a babai ket mannalon manipud Buguias ken kaudian a kaso ti COVID-19 iti probinsia ti Benguet.
Naamuan a nagturturong ti nasao a babai iti La Trinidad ken iti Baguio City.
Manarimaan metten ti disinfection ken contact tracing.
Kabayatanna, nakaruaren iti Luis Hora Memorial General Hospital ti kakaisuna nga indibidual a nagpositibo iti COVID-19 sadiay Mountain Province.
Kasaruno daytoy ti panagnegatibo ti dua a reverse transcription polymerase chain reaction (RT-PCR) tests a nakaipasidongan ti nasao nga indibidual.
Naamuan a manipud naiturong daytoy iti pagagasan ket saan a nakitaan ti aniaman a sintomas ti nasao a sakit.
Maipalagip a kalpasan ti nabayag a panagbalin ti Mountain Province kas COVID-free ket nailistada ti kaunaan a kasoda iti nasao a sakit idi June 16 kalpasan a nagpositibo iti COVID-19 ti maysa a lalaki manipud Suquib, Besao a close contact ti Special Action Force commando a COVID-19 positive a simmarungkar sadiay Besao idi June 6.
Kabayatanna, nakaruar met manipud iti Abra Provincial Isolation Unit sadiay Gaddani, Tayum, Abra ti maysa a nars kalpasan ti panaka-quarantine daytoy iti uneg ti 18 nga aldaw.
Maipalagip a ni AC5 ket na-admit idi June 11 kalpasan a nagpositibo iti COVID-19 ken daytoy ket nakadestino iti Rural Health Uunit ti Licuan-Baay.
Nakaruar daytoy kalpasan a nagnegatibo ti maikatlo ken pinal a swab test daytoy para iti COVID-19.
