BAGUIO CITY – Agtultuloy ti nainget a kampanya ti pulisya kontra iti iligal a panagsugal iti nagduduma a paset ti rehion Cordillera tapnu maksayan daytoy wenno saan ket naan-anay a mapaksiat.
Nangitunda ti kampanya iti panakakemmeg ti 84 nga indibidual ken panakaipila ti 24 a kaso iti korte.
Nakakumpiskar met dagiti pulis iti agarup P77,000 a taya ken nagduduma a gambling paraphernalia iti uneg ti pito a lawas nga operasyon dagitoy.
Naamuan a manipud Marso 1 agingga Abril 16 ket nakaipatungpal dagiti pulis iti pakabuklan nga 26 nga operasyon kontra iti iligal a panagsugal iti nagduduma a paset ti rehion.
Partikular nga achievement dagiti pulis kadagiti nasao nga operasyon ket ti nagsina a panakakemmeg ti 15 a sugadol iti probinsia ti Benguet ken Kalinga.
Gapu iti daytoy, agtultuloy met ti panagapela ti Cordillera PNP iti publiko para iti dagus a panangireportda iti pulisya no adda ti makita dagitoy nga iligal nga aramid iti lugar dagitoy kas iti iligal a sugal tapnu dagus nga agaksion dagiti otoridad.
