BAGUIO CITY – Napatganen ti kanayonan a ruta para iti operasyon ti point-to-point provincial bus paruar ken pastrek iti Baguio City.
Maibasar iti Memorandum Circular No. 2020-0516 nga impaulog ti LTFRB Central Office, maipalubosen ti panagbiahe ti inter-regional bus para iti ruta a Baguio-Mariveles, Bataan ken Baguio-Olongapo City, Zambales.
Nailanad a sag-sangapulo a bus ti napatgan nga agbiahe kadagiti nasao a ruta ngem walo laeng a bus ti agbiahe iti innaldaw kas maibasar iti pammalubos nga impaay ti lokal a gobyerno a destinasyon ti biyahe.
Maibasar met iti Memorandum Circular No. 2020-0511, naipalubos met ti panagbiahe ti lima a bus companies iti ruta a Baguio-Avenida, Baguio-Domestic via Expressway Edsa, Baguio-Pasay City, Central Integrated Terminal-Baguio, Baguio-Manila, Baguio-Cubao ken Baguio-Caloocan City.
Maibasar pay iti panakiyuman ti Bombo News Team iti bus company a nagrugin ti biaheda iti Baguio-Cubao, naamuan a bassit paylaeng dagiti agbalbalin a pasahero dagitoy manipud nangrugi ti biaheda idi Sabado.
