Pimmusay ti siam nga indibidual kalpasan a dinalapos ti maysa a lugan dagiti nagu-ummong a tattao kabayatan ti silibrasion dagiti Pilipino iti Lapu Lapu Day idiay Vancouver, Canada ita nga aldaw, April 27, 2025.
Kinumpirmar dagiti otoridad idiay Vancouver nga adda dagiti pimmusay bayat nga adu dagiti nadangran.
Napasamak ti insidente kabayatan ti piesta dagiti Pilipino kas pananglagipda iti anti-colonial leader a ni Lapu Lapu.
Sigun iti Security Guard iti nasao a piesta a ni Jen Idaba-Castaneto, nagkaiwara ti bagi dagiti tattao.
Gapu iti dayta, saanda nga ammo no sino ti un-unaeda a tulongan.
Kabayatanna, impeksa ni Vancouver Mayor Ken Sim ti pannakipagladingitna kadagiti naapektaran iti nasao nga insidente.
Iti agdama, imet itan dagiti otoridad ti nasao a driver bayat a manarimaan ti imbestigasion.
