BAGUIO CITY – Nasuspendir iti innem a bulan ni Kalinga Governor Jocel Baac gapu iti panangdanogna iti secretary ti Sangguniang Panlalawigan ti probinsia idi tawen 2015.
Sigun kenni Department of the Interior and Local Government (DILG)–Cordillera Director Marlo Iringan, agserbi nga acting governor ni Vice Governor James Edduba bayat nga agserbi met nga acting vice governor ni Atty. Shirlynne Alunday.
Kinunana a posible met a maksayan ti innem a bulan a pannakasuspindir ni Baac la ketdi mangipila daytoy iti motion for reconsideration iti Court of Appeals.
Maipalagip nga idi tawen 2015 ket dinanog ti gobernador ti Provincial Board Secretary Mathew Matbagan kalpasan a napukawan daytoy iti kontrol gapu iti nabara a diskusion maipapan iti board resolution a pannakairikep ti maysa nga ospital sadiay Kalinga.
Impaulog ti Office of the Ombudsman ti nasao a pammilin gapu iti kaso ni Baac nga abuse of authority ken conduct unbecoming of an official bayat a naawat ti gobernador ti pammilin idi June 9.
Nagsapata iti opisina dagiti dua nga acting officials idi kalman.
