BAGUIO CITY – Nakemmeg ti maysa a vegetable porter iti naipatungpal nga entrapment kontra kenkuana babaen a mismo iti vendor a tinakawanna iti kwarta ken gadgets iti uneg ti maysa a balay-pagabangan sadiay Suello Village, Bakakeng Central, Baguio idi kanikadua.
Nabigbig ti suspek a ni Alfie Peralta Ramos, 18-anyos, tubo ti Bimaley Pangasinan, vegetable porter ken residente ti Lower Kitma, Bakakeng Central bayat a nabigbig ti biktimana a ni Rosally Manzano Carpio, 24-anyos.
Maibasar iti report, nariing ti biktima iti parbangon idi kalman kalpasan a nariknana ti natangken a banag a simmagid iti rupana.
Nariing ti biktima ken sadiay a nadiskubrena a mapukpukaw ti bag-na a naglaon ti cash nga P18,000 ken selpon nga aggatad ti P9,900.
Dagus a kinamat ti biktima ti suspek ken bayat ti panagkamatna iti suspek ket natnag manipud iti suspek ti selpon ken tablet ti biktima nga aggatad ti P4,900.
Babaen iti tulong ti boardmate ti biktima ket kinontak dagitoy ti natakaw a selpon ti biktima ken nakumbinsirda ti suspek a mangisubli iti tinakaw daytoy kasukat ti kwarta.
Immanamong ti suspek a makisinnarak iti biktima iti waiting shed iti abay ti maysa a supermarket sadiay Km. 4, Marcos Highway ngem sadiay a kinemmeg dagiti pulis a nagpatulongan ti biktima.
Naamuan a nagaramat ti suspek iti runo iti panagtakaw daytoy.
