BAGUIO CITY – Naibalud ti maysa a lalaki kalpasan a pinagsasawanna dagiti pulis ken kinudkudtaranna ti railings ti temporary lock-up cell ti Baguio City Police Office (BCPO) – Station 7 idi kalman.
Nabigbig daytoy a ni Daniel Balbalin Quillagen, 31-anyos, naasawaan, awanan trabaho, tubo ti Itogon, Benguet ken residente ti Ambiong, La Trinidad, Benguet.
Maibasar iti report, naiturong ti suspek ken ti maysa pay nga indibidual iti istasyon ti BCPO-Station 7 tapnu marisut ti saan dagitoy a nagkinnaawatan kalpasan ti panagsubangda.
Manarimaan ti panangdamdamag dagiti pulis iti suspek ngem nakaunget ti suspek ken sadiay a nangisawang iti saan a napintas a pannarita kontra kadagiti pulis.
Gaputa arogante ti suspek, inturong daytoy dagiti pulis iti temporary lock-up cells ngem kaskasdi a nakaunget ti suspek ken kinudkudtaranna ti railings ti safekeeping facility kagiddan ti panangisawangna iti dakes a pannarita kontra kadagiti pulis.
Iti met pammilin ni Prosecutor Christian Amistad ket naipisok daytoy iti Baguio City Jail.
