BAGUIO CITY – Naispal ti Baguio City Police Office (BCPO) ti dua a babbae a menor de edad nga immunan a nai-report iti opisinada a mapukpukaw itay laeng nabiit.
Sigun kenni PCI Eddie Bagto, dadaulo ti BCPO – Station 1, makalawas a mapukpukaw dagiti dua a balasitang nga agpada a taga-Middle Quirino Hill ditoy siudad ti Baguio ken agada-adal iti maysa a pagadalan sadiay.
Kinunana a maibasar iti panakipatangna kadagiti dua a balasitang ket naamuan a sakbay a nagpukaw dagitoy ket naguyugoy dagitoy dagiti saan pay a nabigbig a grupo.
Inlawlawagna a tunggal grupo ket bukbuklen ti pito nga indibidual nga agpaspasyar iti nagduduma a lugar iti uneg ken ruar ti siudad ti Baguio.
Maibasar iti imbestigasyon, dagiti nasao a grupo ket agturturong kadagiti pagadalan ken ag-recruit kadagiti estudyante a kayatda a makipasyar kadagitoy ken kabayatan ti panagpasyarda ket saanda nga agaw-awid ken saanda nga i-contact ti kapamilya dagitoy.
Naamuan dagiti pulis a makadandanun sadiay Pangasinan dagiti nasao a grupo ngem ti dua a naispal a balasitang ket nagpasyar iti masakupan ti siudad ti Baguio.
Linawlawagan pay ni PCI Bagto nga awan ti pakainaigan dagiti nasao a grupo kadagiti maaw-awagan a hypebeast ken nainget ti panangimbestigarda kadagiti nasao a grupo.
