BAGUIO CITY – Impannakkel ti Philippine Drug Enforcement Agency (PDEA) – Cordillera a simmayaat ti performance dagiti maaw-awagan a Barkada Kontra Droga ditoy rehiyon.
Sigun kenni Atty. Joseph Frederick Calulut, information officer ti nasao nga opisina, masarakan dagiti Barkada Kontra Droga kadagiti pagadalan ken bukbuklen daytoy dagiti estudyante.
Kinunana a ti Barkada Kontra Droga ket bin-ig a volunteerism gaputa para daytoy iti panangtulong kadagiti agtutubo a mangliklik iti iligal a droga.
Dinakamatna a mangisaysayangkat dagiti kameng ti Barkada Kontra Droga iti information dissemination tapno maipaka-ammo kadagiti agtutubo dagiti dakes nga epekto ti panagaramat iti iligal a droga.
Kabayatanna, imbalakad ni Atty. Calulut ti panangsitar dagiti umili kadagiti makitada nga agtutubo nga agin-inom iti arak kadagiti igid dagiti kalsada wenno kadagiti waiting sheds.
Kinunana a daytoy ket gaputa posible a no maigumon iti arak dagiti agtutubo ken nabalit nga isarunoda ti iligal a droga.
Kinunana pay a mabalin nga ireport dagiti umili iti istasyon ti pulisya dagiti makitada nga agi-inom iti arak kadagiti igid dagiti kalsada.
