BAGUIO CITY – Inreport ni Office of the City Social Welfare and Development Officer Betty Fangasan nga idi kalman ket naawaten dagiti amin a 128 a barangay ti Baguio City ti umuna a rasyon dagitoy iti family food packs.
Kinunana a naiwaras dagitoy kadagiti 24,640 a pamilya.
Innayonna a nagtaud dagiti food packs iti pondo ti lokal a gobyerno, donasyon ken dadduma a sources.
Dinakamatna a gaputa makaaw-awatda latta iti kiddaw para iti food packs ket nagkiddaw daytoy iti DSWD a naituding a maipaay iti malem inton bigat ken maipaima met kadagiti nagkiddaw a babbarangay.
Sigun pay kenni Fangasan, maituloy inton bigat ti agsapa ti panakakolektar ti bagas manipud iti warehouse ti National Food Authority para iti panakagudgudwa dagiti food packs inton Lunes.
Mangnamnama daytoy a maitedda ti maikadua a rikos ti rasyon iti umuna a lawas ti Abril iti kanito a maisumitir dagiti babbarangay ti liquidation dagiti naawat dagitoy manipud iti opisinada.
