BAGUIO CITY – Nagkalintegan ti Public Order and Safety Division (POSD) ti lokal a gobyerno ti Baguio iti isyu a panang-tiket ti maysa kadagiti personnel dagitoy iti maysa a visually impaired a residente ti La Trinidad, Benguet.
Iti interview ti Bombo Radyo Baguio kenni POSD head Marvin Herrera, inyunay-unayna a saan a tuleng ken saan a naan-anay a bulag ti nasao nga indibidual gaputa makakita paylaeng daytoy.
Dinakamatna a sakbay pay ti panagballasiw ti nasao nga indibidual ken ti kadwa daytoy iti kalsada ket namin adu a binagaan ti POSD enforcer a maipawil ti panagballasiw iti nasao a disso.
Nupay kasta, timmaray a nagballasiw iti kalsada ti nasao a lalaki.
Innayonna a kinasao ti POSD personnel ti nasao a lalaki ken sadiay met nga inaklon ken nagkiddaw daytoy ti dispensar.
Inyunay-unay ni Herrera a no naan-anay a bulag nga adda sarukodna ti nasao a lalaki ket maawatanda daytoy ken tinulongan pay ti POSD enforcer.
Dinakamatna nga ammo dagiti kakadwana a mangkita kadagiti indibidual a nasken a matulongan ken dagiti aglablabsing kadagiti paglintegan ti siudad.
Namnamaenda pay nga iti panakasitar dagiti violators ket agnakemen dagitoy ken saanda nga agaramid ti wagas tapnu maiparang a dagitoy ti biktima malaksid pay a nasken a sangwenda dagiti multa ken bunga ti panaglabsingda.
Nupay kasta, impasiguradona nga ituloy ti POSD a mangaramid iti mandatoda para kadagiti umili ken iti pagsayaatan ti siudad ti Baguio.
