BAGUIO CITY – Pinaglibakan ni National Commission on Indigenous Peoples (NCIP)-Cordillera and Region 1 Commissioner Gaspar Cayat dagiti alegasyon ti Dallac-Nanong-Minanga Indigenous Peoples Organization (DANAMI IPO) seknan iti maatap a saan a direkta a panagkikilna para iti panakaituloy ti singasing nga Upper Tabuk Hydro Power Plant.
Iti interview ti Bombo Radyo, saggaysa a sinungbatanna dagiti alegasyon nga imbinglay ni Jerome Tabanganay, Presidente ti DANAMI IPO.
Kinunana a nakiballaet laeng daytoy iti proyekto gapu kadagiti naawatna a reklamo iti proyekto nga impila dagiti maseknan nga umili a nagresulta iti panagsanod ni Tabuk City Mayor Darwin Estrañero ken dadduma pay a nainsigudan nga umili iti katulagan iti nagbaetan dagiti maseknan nga umili ken ti kompanya a mangipatungpal iti proyekto.
Inyunay-unayna nga awan ti dadduma a rantana iti panakiballaetna no di ti mapapartak ti panakaituloy ti proyekto gaputa posible a mabayagan ti proyekto no agtultuloy ti timmaud nga isyu iti daytoy ken mabayagan ti panaguray dagiti benipisaryo.
Impettengna nga indalanna iti customary laws wenno cultural practices ti panakiballaetna kas panakabagi ti NCIP ken saanna a kayat nga agbalinda a lapped iti pagsayaatan dagiti umili nangruna dagiti nainsigudan a tattao.
Innayonna nga awan ti panakibiang a naaramid idi nakiballaet daytoy gaputa nalpasen ti panaka-aramid ti katulagan.
Dinakamat pay ni Commissioner Cayat a ti panakaiballaetna ket tapnu mapagsaritaanen iti nagbabaetan dagiti maseknan a grupo ken ti lokal a gobyerno tapnu saanen a maidanon iti Central Office ti NCIP.
Impetteng ni Commissioner Cayat a saanna a pulos nga impilit a ti 50-50 sharing agreement ti kiddawen dagiti maseknan nga IPs iti singasing nga Upper Tabuk Hydro Power Plant.
Kinunana nga imbagana laeng kadagiti nakataripnongna nga elders nga “ideal” wenno maiparbeng ti 50-50 a sharing agreement iti nasao a proyekto gaputa dagiti Indigenous Peoples (IPs) ti agtagikua iti daga bayat a puunan laeng ti idanon ti imbestor.
Impettengna nga awan ti imbagana a saan a pirpirmaan dagiti benipisaryo ti katulagan.
Inyunay-unayna a ti impalawagna ket nasken nga agkoordinar wenno agsasarita dagiti opisyales ti gobyerno ken dagiti elders tapnu marisut ti timmaud a pakaseknan a saan a malaukan ti pulitika ken negosyo.
Impannakkel pay ti commissioner a saan a pulos daytoy a nagkiddaw ti kwarta wenno porsiento manipud kadagiti tinultulonganna nga IPs iti rehion a nakaala ti bingay dagitoy manipud kadagiti maseknan a kompanya.
Kinuwestionaranna metlaeng ti probisyon a saan a panagbayad ti revolutionary tax a nailanad iti memorandum of agreement (MOA) a nabukel iti nagbaetan dagiti Indigenous Peoples (IPs) ken ti kompanya a mangipatungpal iti singasing nga Upper Tabuk Hydro Power Plant.
Kinuwestionaranna no apay a nainayon ti nasao a probisyon ken kinuwestionaranna no apay nga agbayad iti nasao a buis.
Gapu iti daytoy, impa-ikkatna ti nasao a probisyon iti mapirmaan a katulagan.
Inyunay-unayna pay a nasken a maipasigurado nga ammo dagiti umili ti amin a transaksionda para iti pagsayaatan ti Tabuk City.
Dinakamatna metlaeng a ti grupo ni Jerome Tabanganay ti maka-ammo iti katatao ni Engr. Daniel Peckley Jr., ti proponent ti nasao a proyekto.
Impetteng pay ni Commissioner Cayat a nakalukat latta daytoy iti panakaituloy ti saritaan para iti panakaituloy ti proyekto para iti pagsayaatan dagiti amin nga umili sadiay Tabuk City.
