BAGUIO CITY–Kiniddaw ti lokal a gobierno ti La Trinidad, Benguet ti aktibo a panakitinulong dagiti nagduduma a barangay officials kontra kadagiti operasion nga adda pakainaiganna iti iligal a droga sadiay La Trinidad Trading Post.
Immunan nga imbilin ni La Trinidad Mayor Romeo Salda ti nainget a panagbantay ken panagwanawan ti kameng ti pulisya kadagiti trading centers a masarakan iti nasao nga ili.
Kasaruno daytoy ti pannakatiliw ti dua a packer a sumangsango iti kaso a panaglabsing iti RA 9165 wenno Comprehensive Dangerous Drugs Act of 2002 itay laeng nabiit.
Patien ti opisyal agingga ita ket ado latta dagiti trabahador ken biyahero sadiay nga agibibiyahe iti iligal a droga.
Maibasar iti impormasion, kaadduan a pakatiltiliwan dagiti indibidual nga adda pakainaiganna iti iligal a droga ket sadiay La Trinidad Trading Post.
Nupay kasta, positibo latta dagitoy a maparmeken ti panagraira ti iligal a droga iti munisipyo ti La Trinidad babaen iti naingetan a pangtinnulong dagiti maseknan a sektor. (with Bombo Janice Juanito)
