BAGUIO CITY – Saan a sakop ti Republic Act (RA) No. 11229 wenno Child Car Seat Law dagiti parapubliko a lugan.
Nagbalin a pammalawag daytoy ni Land Transportation Office (LTO) – Cordillera Regional Director Francis Ray Almora kasaruno ti dinakamat ti Highway Patrol Group (HPG) – Cordillera a mabalin a sumango iti kaso a panaglabsing ti RA 11229 ti driver a nangimaneho iti taxi a nakatnagan ti maysa nga 1-year old nga ubing iti deppaar ti Irisan Road ditoy siudad ti Baguio idi laeng nabiit.
Sigun kenkuana, saan a responsibilidad ti driver ti nasao a kaso gaputa saan a sakupen ti RA 11229 dagiti parapubliko a luglugan a pakairamanan dagiti taxi.
Maipalagip a nadangran ti nasao nga ubing kalpasan a natnag manipod iti tumartaray a taxi gapu iti aksidente a panakailukat ti ridaw ti nasao a lugan.
Inlawlawag pay ni Almora a maiyaplikar ti nasao a linteg kadagiti pribado a lugan.
Kinunana dagiti amin nga agtagikua ti lugan ket addaan ti responsibilidad a mangimuntar iti Child Restrain Seats babaen iti panagsukimat ti LTO.
Inyunay-unayna nga awan ti probisyon ken Implementing Rules and Regulation ti RA 11229 a nangilanad a karaman dagiti parapubliko a lugan iti daytoy.
Sagudayen ti RA 11229 a mamulta iti P1,000 agingga P5,000 ken masuspindir ti driver’s liscense ti motorista nga aglabsing iti daytoy.
