BAGUIO CITY – Manamnama nga iti ngudo ti sumaruno a bulan ti Pebrero ket malpasen ti manarimaan a Community-Based Monitoring System (CBMS) ditoy siudad ti Baguio nga immunan a naiyusuat idi Oktobre ti napalabas a tawen.
Maibasar iti schedule ti proyekto a binukel ti City Planning and Development Office (CPDO), kagiddan ti panagleppas ti CBMS ket addan ti naaramid a household level data a maaramat iti panagplano ti lokal a gobyerno ken iti panagilatang ti pondo.
Manamnama pay nga addan ti nasanay a personnel ti lokal a gobyerno mainaig iti panagkolektar ken panagiproseso ti datus babaen kadagiti modules ti programa.
Maipalagip a babaen iti CBMS ket makolektar dagiti datus wenno impormasyon a mangilanad iti rason iti kinakurapay iti maysa a lugar.
Maaramat met ti datus iti panakabukel dagiti programa a mangtutuk iti panakaparmek ti kinakurapay ken mangital-o ti panagdur-as babaen iti nagduduma a proyekto ti gobyerno.
Marukod pay ditoy ti transparency ken accountability ti gobyerno nangruna iti panagilatang ti pondo.
Immuna metten a naipasigurado ti confidentiality dagiti impormasyon a maala manipud kadagiti indibidual ken pagtaengan a maipasidong iti CBMS.
Ti tema ti CBMS ket “Napapanahon at Angkop na impormasyon, Gabay ng Bayan sa Pag-ahon.”
