BAGUIO CITY – Matutukan manen ti National Greening Program (NGP) ti Department of Environment and Natural Resources (DENR) ita a tawen ken maitampok ti panakaimula dagiti indigenous species dagiti kayo kadagiti protected areas iti Cordilleras.
Sigun kenni DENR-CAR Regional Director Ralph Pablo, puntirya ti NGP a mapasayaat ti salun-at wenno kasasaad dagiti watersheds.
Kinunana nga iti pondo ti ahensia para ita a tawen, matutukan ti NGP ken kangrunaan a mamulaan dagiti watershed areas ken dagiti protected areas.
Innayonna a tutukan ti DENR-Cordillera ti Intensified Forest Protection Program sadiay Apayao nga agingga ita ket addaan ti saan a nagargaraw a kabambantayan.
Dinakamat met ni DENR-CAR Assistant Regional Director for Technical Services Maximo Soriano Jr. nga agtultuloy ti panagtinnulong ti ahensia ken dagiti komunidad, people’s organizations ken dagiti pamilya iti implementasyon ti NGP.
Sigun kenkuana, agbalbalin ti NGP kas family-based gaputa adda akem dagiti pamilya manipud iti panakapataud dagiti bukel wenno semilya agingga iti panakaisagana dagiti pagmulaan.
Innayonna nga adda ti letter of agreement ti DENR ken dagiti maseknan a pamilya, no sadino, dakkel a makatulong ti programa iti pamastrekan dagiti benipisaryo.
Naiyusuat ti NGP idi 2011 tapnu mamulaan ti 1.5-M nga ektarya a lote agingga 2016 ngem babaen iti Executive Order No. 193 ket nailaylayon daytoy agingga iti 2028 tapnu mamulaan amin a nabatbati a daga iti pagilian a nasken a mamulaan ti kaykayo.
