BAGUIO CITY – Agtultuloy ti panangirikep ti lokal a gobyerno ti Baguio kadagiti isolation units iti siudad kasaruno ti agtultuloy met a panagbaba ti kaso ti COVID-19 iti lokalidad iti napalpalabas a lawas.
Sigun kenni City Health Officer Dr. Rowena Galpo, daytoy ket tapnu makainot ti siudad iti gastos ken matutukan metten dagiti available personnel dagiti dadduma a health-related activities tapnu makontrol ti panagwaras ti virus.
Dinakamatna nga iti ngudo ti agdama a bulan ti Pebrero ket mairikep ti Laurel Dorm 2 a quarantine facility dagiti health workers, ti Ferionni Apartment ken ti Eurotel.
Kinunana nga agtalinaed met ti operasyon ti Baguio City Community Isolation Unit iti sigud a Sto. Niño Hospital ken ti central triage iti compound ti Baguio Convention Center.
Maibasar iti kaudian a datus ti City Health Services Office, ad-adda pay a bimmaba ken nagbalinen nga agarup 42% ti hospital care utilization rate dagiti nagduduma a parapubliko ken pribado nga ospital iti siudad bayat a ti occupancy rate dagiti isolation units ket nagbalinen nga agarup 10%.
Sigun kenni Dr. Galpo, dagiti personnel kadagiti agrikep nga isolation units ket agserbi iti manarimaan a panagbakuna kadagiti ubbing, iti panaka-triage dagiti umad-adu a travelers iti siudad iti central triage unit ken dadduma pay a trabaho a bigbigen dagiti health workers.
Innayonna nga adda met dagiti tumulong iti limitado a contact tracers ti siudad kasaruno ti saan a panangpabaro ti Department of Interior and Local Government (DILG) iti kontrata dagiti contact tracers ti ahensia.
