BAGUIO CITY – Impetteng ti kampo ni suspended BuCor Chief General Gerald Bantag a bias ni Justice Secretary Jesus Crispin Remulla iti kaso a sangsangoen ni Bantag.
Iti interview ti Bombo Radyo Baguio, kinuna ni Atty. Rocky Balisong, legal counsel ni General Bantag, arigna a kasla metten ni Secretary Remulla ti complainant ken imbestigador gaputa isuna ti mangipetpetteng a guilty ni Bantag iti sangsangoenna a kaso.
Gapu iti daytoy, nangipila ti kampo ni General Bantag ti motion for inhibition tapno maparitan ti Department of Justice a mang-imbestigar iti murder complaint a naipila kontra kenni Bantag ken maipabiyang ti imbestigasyon iti Office of the Ombudsman.
Impaganetget pay ni Atty. Balisong a saan a “Delaying Tactics” ti ar-aramidenda gaputa karbengan ni General Bantag nga agkalintegan nangruna nu ti investigating agency ket bias, partial ken adda ti isyu iti jurisdiction.
Maipalagip a napilaan ni Bantag ti kaso a murder kasaruno ti ipupusay daydi radio broadcaster Percy Lapid ken ti balud iti New Bilibid Prison a ni Jun Villamor.
