Pinadayawan ti Philippine Air Force (PAF) idi laeng kalman ti dua nga airmen a pimmusay iti pannakadungpar ti FA-50 fighter jet itay nabiit idiay Mount Kalatungan sadiay Bukidnon.
Nilagip ti PAF ti sakripisio ni Major Jude Salang-Oy, a kameng ti Philippine Military Academy (PMA) “Siklab Diwa” Class of 2014, ken nagserbi a “with distinction” iti nasurok a sangapulo a tawen.
Adu ti kritikal a mision ni Salang-Oy iti intero a karerana, sigun iti PAF.
Maysa ni Salang-Oy kadagiti indibidual a paset ti deployment ti PAF itay laeng nabiit a Pitchblack Exercise idiay Darwin, Australia.
Kabayatanna, ni First Lieutenant AJ Dadulla ket kameng ti Philippine Air Force Officer Candidate Course “SINAGLAWIN” Class of 2020, a nangipakita kadagiti naisangsangayan a paglaingan ken kinalaing karaman ti panangpatayabna ti “most advanced” nga PAF fighter aircraft.
Agpada a kameng ti 7th Tactical Fighter Squadron wenno Bulldogs ni Salang-oy ken Dadulla.
Naiturong ti bangkay dagitoy iti funeral parlor idiay Cagayan de Oro ken naikeddeng a maiturong dagitoy ita nga aldaw iti Villamor Airbase iti pammadayaw kenkuada.
Ni Dadulla ken naituding a maikasar kuma iti fiancée daytoy inton Marso 15.
Maipalagip a mapukpukaw ti fighter jet iti agsapa ti Martes bayat ti tactical night operation.
Iti simmaruno nga aldaw, ti eroplano ket nasarakan a nadadael bayat a dagiti dua a piloto ket nasarakan a pimmusay idiay Bantay Kalatungan.
