Inlawlawag ti Atok Municipal Tourism no sadino ti kaar-aramatan ti environmental fee a makolkolektar kadagiti turista a bumisbisita sadiay barangay Paoay, Atok, Benguet.
Iti panakiuman ti Bombo Radyo kenni Johanna Mae Lopez- Balao, Tourism officer I, impakaamona a ti environmental fee a sinsingirin dagitoy ket maar-aramat para iti solid waste management, kadagiti nagduduma a proyekto ti barangay Paoay ken munisipyo ti Atok.
Sigun kenni Lopez-Balao, kagiddan ti panagrang-ay ti turismo ket ti parikut iti basura, gapu idi dayta, ti environmental fee ket maus-usar para iti panakaibyahe dagiti basura sadiay Pangasinan nga isu’t agdama a ladfill a pangiturturongan ti Atok iti basura dagitoy gapu ta awanan iti bukod a landfill ti nasao a munisipyo.
Malaksid iti dayta, naaramat met laeng dagiti daduma pay a collection para iti panakagatang ti garbage truck.
Innayon pay ti nasao nga opisyal nga iti environmental fee ket 60% ket agturong iti munisipyo ti Atok bayat a 40% ti agturong iti barangay Paoay.
Inyunay-unayna pay nga amin dagiti collection ket mar-aramat para iti pag-imbagan iti nasao a barangay ken munisipyo.
Gapu iti dayta, makidkiddaw ti panakaawat ti publiko no apay a kasapulan ti panakaipatungpal ti environmental fee bayat a kanayun met a silulukat ti opisina dagitoy para iti anyaman a damag.
Iti nasao nga environmental fee, P50 ti bayadan ti tunggal indibidual, ngem adda iti 20% discount kadagiti senior citizens ken person with disabilities.
Kadagiti agtawen iti pito pababa, daytoy ket libre.
Ngem, maipalpalagip a ti nasken a pagbayadan ket iti Treasury office.
