Kinumpirmar ti pannakangiwat ti ICC nga adda iti kostodia ti ICC iti detention facility idiay Scheveningen, The Hague ni sigud a President Rodrigo Duterte.
Daytoy ket kalpasan a kinuna ni sigud nga Executive Secretary Salvador Medialdea a saanda nga ammo nu sadinno ni Duterte, ken impakaamona nga awan iti pagbaludan ti ICC ti sigud a presidente.
Sigun kenni Fadi El Abdallah, ICC spokesperson, ni Duterte ket naipasidong iti medical check ups kas paset ti standard procedure.
“M. Duterte is under ICC custody at the ICC detention centre in Scheveningen. He was admitted today following all medical checks.”
“When a suspect arrives in ICC custody, the Court as standard practice takes measures to protect the health and well-being of the suspect.”
Kinuna pay ni El Abdallah nga ipablaak ti korte ti schedule para iti inisial a panagparang ni Duterte.
Iti maysa nga interview iti ruar ti detention center, kinuna ni Medialdea a kiniddawda iti ICC nga iturongda ni Duterte iti ospital apaman a makasangpetda gapu iti nakapuy a salun-atna.
Immanamong met ti ICC, ngem kinuna ni Medialdea a saanda a naipaayan ti impormasion nu sadinno ti pangiturunganda kenkuana.
Daytoy ti rason a kinuna ni Medialdea nga awan iti uneg ti detention facility ni Duterte idi pinadasna a sarungkaran isuna.
