Nakairekord ti Department of Health (DOH) iti uppat a gasut duapulo ket innem a pimmusay mainaig iti rabies idi 2024.
Sigun iti nasao nga ahensia, 193 a kaso wenno 45% ti pimmusay gapu iti kagat ti aso wenno “exposure” kadagiti taraken nga ayup, nu sadinno 41% kadagiti kaso ket mainaig iti saan a nabakunaan nga ayup bayat a 56% ket mainaig iti saan a masigurado a kasasaad ti pannakabakuna iti rabies.
Karaman kadagiti kangrunaan a naapektaran a rehion ket manipod iti Central Luzon nga addaan ti 56 a kaso, CALABARZON nga addaan ti 35 a kaso, ken SOCCSKSARGEN nga addaan ti 43 a kaso.
Ti nasao a bilang ket nangatngato manipod iti 235 a kaso idi tawen 2020, dandani agdoble iti uneg ti uppat a tawen.
Manipod iti tawen 2020 agingga 2024, pakabuklan a 1,750 rabies-related deaths ti nairekord.
Para iti agdama a tawen,nakairekord ti Department of Health ti lima pulo ket lima a kaso ti rabies manipod idi Enero a uno agingga Marso a uno, nababbaba iti tallo pulo ket siam a porsiento manipod iti siam a pulo a kaso a naireport bayat ti agpada a “period” idi napalabas a tawen.
Sigun kenni Department of Health Secretary Ted Herbosa, delikado ken makapapatay ti rabies ken mabalin a magun-od daytoy babaen ti kagat, “kalmot,” wenno katay ti ayup nga addaan iti rabies no dilpatan ti tao ti sugat, mata, agong, wenno ngiwat.
Ti sintomas ti rabies ket mabalin nga agparang iti dua agingga tallo a bulan kalpasan ti “exposure” ngem mabalin nga agdur-as iti las-ud laeng ti maysa a lawas wenno iti maysa laeng a tawen a nakadependa iti virus ken pagserkan ti rabies iti bagi ti maysa a tao.
Ti inisial a sintomas daytoy ket pakairamanan ti panaggurigor,panagkapsot, “wound inflammation,” hydrophobia wenno panagbuteng ti danum, aerophobia wenno panagbuteng ti angin, pannakariro, ken paralysis, ken kamaudiananna mangiturong iti makapapatay a brain ken spinal cord inflammation.
Idagdagdag ti nasao nga ahensua kadagiti agtagikua ti taraken a pabakunaanda ti ayup dagitoy iti tunggal tawen tapno maliklikan ti impeksion ti rabies.
