BAGUIO CITY – Im-imbestigaran ti Bureau of Fire Protection (BFP) – Baguio ti rason iti pannakauram ti agarup 6,000 square meter a paset ti Camp John hay forest reserve idiay Loakan Baguio City, pasado alas tres ti malem idi kalman.
Iti interview ti Bombo Radyo, kinuna ni Senior Fire Officer 1 Loyd Ashley Furigay- Information Officer ti BFP – Baguio, naitawag kadakuada ti mapaspasamak nga uram, pasado alas kwatro ti malem ken dagusda met a rinespondean daytoy.
Naideklara met ti fire-out, 5:10 pm ken awan ti nadangran iti nasao nga insidente.
Dinakamat ni Furigay a tallo a fire truck ti nagresponde ken ado dagiti water truck a nagboluntaryo a timmulong kas iti Baguio Water District, Dipasupil, 911 on call ken BCDA tanker.
Ti nasao nga uram ket isu iti maikadua a forest fire a nairekord iti Baguio City ita a tawen.
