Inaklon ni Pol Lt. Col. Daniel Pel-ey, Public Information Officer ti Police Provincial Office Abra a Low morale ita dagiti kameng ti Polisya idiay Abra gapu iti nagsasaruno nga insidente ti pammaltog sadiay.
Nupay kasta, kinunana a karit daytoy kadakuada tapno nainget a tungpalenda ti pagrubenganda.
Iti pannakiuman ti Bombo Radyo iti nasao nga opisial, kinunana a dumanon iti 18 ti bilang dagiti shooting incident sadiay Abra manipud Enero ken Marso iti agdama a tawen no sadino, kaaduan kadagitoy ti nailista sadiay Bangued.
Iti nasao a bilang, maysa iti daytoy ti nabiripikar nga Election related incident a nakairaman ti kandidato para iti kina-mayor ti Pilar, Abra.
Dadduma kadagiti insidente ti pammaltog ket saan pay a biripikado no adda ti pakainaiganna iti eleksion.
Iti agdama, agtaltalinaed nga “orange category” dagiti tallo a Munisipio idiay Abra partikular iti Bangued, Pilar ken Bucay.
Inlaklon ti nasao nga opisial nga “alarming” ita ti mapaspasamak a pammaltog sadiay Abra isu’t gapuna a kidkiddawenda metlaeng ti pannakikaykaysa ti publiko iti nasao a probinsia tapno mabantayan dagiti tattao.
Kabayatanna, addan dagiti naipatulod a personel manipud iti Police Regional office-Cordillera sadiay nga agserbi kas katulunganda tapno agtalinaed ti linak ken kapya sadiay.
Mainaig iti dayta, kinuna ni Pol Lt. Col. Pel-ey a saan pay kuma a maipasidong iti COMELEC control ti Abra, agsipudta kabaelan paylaeng ti kapulisan ken soldado a bantayan ti nasao a probinsia.//mp4
