Manarimaam paylaeng ti imbestigasion ti Bureau of Fire Protection ti rason ti napasamak nga uram iti paset ti Tuba, Benguet nga asideg iti “boundary” ti Camp 7, Baguio City ken Tuba, Benguet.
Iti report ni Bombo Noveh Organo, naimatanganna a saan unay a nalawa ti nauram a bantay iti nasao a lugar.
Immuna a nagturong ti Bureau of Fire Protection-Baguio City iti nakapasamakan ti uram, ngem immikkat dagitoy apaman a nakadanonen ti Bureau of Fire Protection-Tuba.
Inaklon ti Bureau of Fire Protection-Tuba a narigatanda a nangsapul ti maur-uram a paset ti bantay.
Sigun iti nakasaksi a nakapatang ti Bombo Radyo, ken maysa kadagiti “uploader” ti video iti napasamak nga uram, kinunana nga agarup ala una ti malem ita nga aldaw idi nakitana ti asok ti uram iti makin-ngato a paset ti bantay.
Iti panagobserbar ti nakasaksi, kalpasan ti tallo pulo a minutos, nakitana a pimmigsan ti apoy.
Kabayatanna, sigun met iti maysa pay kadagiti nakasaksi nga asideg iti lugar a nakapasamakan ti uram, a ni Renato Ebuanga, agarup alas onse agingga alaso dose ti pangaldaw ita nga aldaw nga adda ti nangngegna nga adda ti agpapaputok, ngem idi inasitganna, adda gayam ti mapaspasamak nga uram.
Gapu iti dayta, dagos met a rinugyanna ti nagsebseb iti ngato a paset tapno saan unay a lumawa pay ken madanon ti sumagmamano a “kalapaw” wenno babbalay sadiay.
Imbinglayna a dandani dua nga oras a nagsakdo daytoy ti danum tapno laeng sebseban ti uram.
Malaksid kenkuana, timmulong pay ti kaanakanna ken ti maysa a kaarubana iti panagsebseb ti uram.
