Impadamag ti Department of Health (DOH) idi kalman ti 23% a panagbaba dagiti kaso ti dengue iti intero a pagilian iti bulan ti Marso.
Maibasar iti datos ti nasao nga ahensia, dumanon iti 9,289 a kaso ti dengue ti nailista manipod Marso disi sais agingga baente nuebe, iti agdama a tawen, nababbaba ngem ti 12,050 a kaso manipod idi Marso a dos agingga a kinse iti agdama a tawen.
Nakailista pay ti nasao nga ahensia iti 0.36% case fatality rate, wenno dandani uppat a pimmusay iti tunggal 1,000 a kaso ti dengue.
Posible a gapu iti “vector control” ti komunidad, bimmaba ti kaso ti dengue, pakairamanan ti panangdalus kadagiti pagitlogan dagiti lamok.
Kabayatanna, guyguyuguyenna ti publiko nga agsagana para iti “wet season” a mangrugi inton Hulio.
Manipod idi Enero agingga Abril iti agdama a tawen, dumanon iti 95,262 a kaso ti dengue ti nailista iti pagilian, nangatngato iti 75% a nailista idi tawen 2024 a dumaon iti 54,556 a kaso.
Impalagip ti nasao nga ahensia nga agkawes iti long sleeves ken pantalon, ken mangi-aplikar iti insect repellent tapno masalakniban manipod iti kagat dagiti lamok.
