Nakemmeg ti maysa a Chinese national a nagpammarang a kameng ti Presidential Anti-Organized Crime Commission ken nangkikil iti padana a Chinese kasukat ti mapapati pannakawayawaya ti maysa a natiliw iti raid ti Philippine Offshore Gaming Operator.
Nakemmeg ti puntiria nga indibidual kaduana ti dua pay a Chinese iti naipatungpal nga entrapment operation ti PNP-Criminal Investigation and Detection Group idiay Parañaque City.
Sigun kenni Police Maj.Gen. Nicolas Torre III, hepe ti CIDG, nagramot ti operasion iti reklamo ti PAOCC seknan iti agar-aramat ti nagan ti ahensia.
Nagturong metlaeng iti opisina dagiti otoridad ti dua a Chinese a nangipulong seknan iti panangikil ti suspek.
Mapapati a napangtaan pay isuda a nu saanda a makaipaay ti kanayunan a bayad ket matorture ken maipadeport ti natiliw a Chinese.
Sigun kenni Undersecretary Gilberto Cruz, executive director ti PAOCC, nakabalud iti temporary detention center idiay Pasay ti natiliw nga indibidual.
Nagkedked met a mangipaay ti impormasion ti suspek a sumangsango iti reklamo a robbery-extortion.
Sigun kenni Cruz, daytoyen ti maikatlo a bunggoy a natiliwda ken mangpirpirdi iti ladawan ti PAOCC.
