Balligi a nagleppas ti maika-innem a “Mangan Taku” Cordillera Food Festival a programa iti Department of Tourism idi kalman sadiay Rose Garden, Burnham Park.
Bayat ti panagleppas ti nasao a festival, kinuna ni Jovita Ganongan, Regional director ti Department Of Tourism-Cordillera a saan laeng a nakapokus ti nasao a fiesta ti pannakaitandudo ti nagduduma a nagkamaimas a produkto wenno taraon iti rehion Cordillera nu diket karaman ditoy iti pannakaitandudo ti kinapateg iti “sustainability ” ken ” community empowerment”.
Kinunana pay a daytoy nga aktibidad ket maysa a platform para iti panakaitampok dagiti traditional a wagas ti panagluto manipud kadagiti innem a probinsya ti rehion Cordillera.
Iti sabali a bangir, agyamyaman dagiti sumagmamano a nakipaset iti Mangan Taku festival gapu iti oportunidad a maipapaay kadakuada tapnu itandudo dagiti tagilako wenno produkto dagitoy.
Iti pannakiuman ti Bombo Radyo kenni Raymart Gamboa – owner iti Benguet brews umanay iti lima nga aldaw a naipaay kadakuada tapnu maipakita dagiti Cordilleran a taraon ken mainum kadagiti turista ken kadagiti local residents metlaeng.
Impeksana pay a sipud umuna nga aldaw iti nasao nga aktibidad ket suportado ti Department Of Tourism ken dagiti tao gapu ta mayat ti taray ti negosyo wenno ti impatakder dagitoy a shalleys.
Imbinglayna a sipud 2019 ket nakipaspaset dagitoy iti nasao nga aktibidad nga isu iti nagrugyan a limmatakan dagiti produkto dagitoy.
Kabayatanna, libre met dagiti pannakaipatakder dagiti shalleys dagitoy kadagiti amin nga accredited iti Department of Tourism.//Bombo Noveh Organo
