Kinumpirmar ti Department of Justice (DOJ) idi kalman a ti reklamo a physical injuries ken grave threats ket naipila kontra kenni Davao City 1st District Rep. Paolo Duterte.
Sigun kenni Prosecutor General Richard Anthony Fadullon, naawat ti DOJ idiay Manila ti kopia ti reklamo idi kalman.
Ti maipagarup nga insidente ket mapapati a napasamak iti Hearsay Gastropub sadiay Davao City agarup alas 3 ti bigat ti Pebrero 23, 2025.
Ti nagreklamo ket ni Kristone John Patria, 37-anyos a negosiante nga agnanaed iti Davao City.
Naigiddan iti pannakaipila ti reklamo ket ti pannakaiwaras ti video a mapapati a nakakitaan ni Duterte a simrek iti maysa a bar ken nangsango ken nangatake iti maysa nga indibidual.
Iti agdama, awan pay ti komento ni City 1st District Rep. Paolo Duterte seknan iti nasao a banag
