Pimmusay ti dua nga indibidual ken nadangran ti sumagmamano nga indibidual kalpasan a binangga ti maysa nga SUV ti departure area ti Ninoy Aquino International Airport (NAIA) Terminal 1 itay agsapa.
Sigun kenni Transportation Secretary Vince Dizon, ti maysa kadagiti pimmusay ket menor de edad nga anak ti overseas filipino workers.
Maibasar iti report ti Philippine Red Cross, dagiti casualties ket maysa a lalaki ken 4-anyos nga ubing.
Makipagladladingit met dagitoy iti nasao nga insidente nangruna kadagiti napukawan iti biyag.
Maibasar iti report, naipakaamo nga addan a nasecure ti nasao a lugar babaen iti personnel dagiti New NAIA Infra Corp.(NNIC), Philippine National Police ken Manila International Airport Authority (MIAA).
Dagiti nadangran ket dagus a naipaayan iti medical attention bayat a ti driver ti SUV ket naiturong iti kustodiya ti Philippine National Police.
Dumanon met iti lima nga ambulansya ken sangapulo ket walo a volunteers ti nagresponde iti daytoy.
Iti agdama, manarimaan ti imbestigasyon iti nasao nga insidente.
