Pinaglibakan ti Malacañang ti alegasyon ni Vice President Sara Duterte a politically motivated ti impaiyulog a direktiba ni President Ferdinand Marcos Jr.tapno maimbestigaran ti water utility firm nga ipatpataray ken tagikua dagiti Villar.
Sigun kenni Palace Press Officer Claire Castro, awan ti manamnama a nasayaat a pannarita nga isawang ni VP Sara para iti presidente ken iti agdama nga administrasyon.
Innayon ni Castro nga ar-aramiden laeng ni VP Sara a pambar wenno depensa ti ibagbagana a panagpulitika ngem saanna met a diretso a sungbatan dagiti isyu a sangsangwenna.
Gapu iti dayta, hinamon ni Castro ti bise presidente a makipagdiskurso daytoy iti nangatngato a level nga awan ti maaramat a saan a nasayaat a pannarita wenno panangisawang iti dakes.
Kabayatanna, nakasagana met ti maseknan a water utility firm a makipaset iti dialogue tapno marisut dagiti pakaseknan iti ipapaay dagitoy a serbisyo ken ti naan-anay a panakitinnulongda kadagiti Local Water Utilities Administration.
